فريدي البياضي: الحكومة اتجننت.. ومش لاقية مصدر فلوس غير جيب المواطن
تحدث النائب فريدي البياضي عضو مجلس النواب عن الحزب المصري الديمقراطي الاجتماعي؛ تعليقاً على قانون زيادة رسوم و ضرائب على السلع المستوردة بدأ النائب قائلاً: أشكرك يا ريس لمنحي الكلمة و لا أشكر وزير الجباية اقتبس بعض الأبيات اللي قالها مواطن مصري بسيط و اوجهها للحكومة.
فريدي البياضي: الحكومة اتجننت.. ومش لاقية مصدر فلوس غير جيب المواطن
وتابع، "الحكومة مش لاقية مصدر فلوس غير جيب المواطن ؟!، افرض ضريبة على الكلام وعلى السلام وعلى الابتسام، افرض ضريبة على ابراهيم عشان بيشبه أخوه حسام، افرض ضريبة على اللي دقنه طويلة جداً، خد غرامة من الديوك إزاي من غير تصريح بتدن (تؤذن)، افرض ضريبة على الميت من المرض؛ لأنه مش لاقي الدوا، وخد ضريبة من اللي ماشي وهوا ساكت؛ ما هو ماشي يتنفس هوا، افرض ضريبة على السعادة، سميها تمن الانبساط".
خد إتاوة من اللي نايمين على البلاط، افرض ضريبة على الفقير لو كان يتمنى يمشى جنب قصر، وافرض ضريبة على اللي ينطق اسم مصر، افرض ضريبة على النجوم علشان بتطلع في السما، وافرض ضريبة على العيون مش برضه أحسن من العمى
واستكمل النائب: "الحكومة جاية تقول انها بتزود الرسوم على السلع الاستفزازية ، ما فيش حاجة استفزازية اكتر من الحكومة واللي بتعمله، هو فنجان القهوة استفزازي ، ساعة اليد وماكينة الحلاقة استفزازية ولعبة الطفل استفزازية ؟! ودخول السينما والمسرح والسيرك استفزازي ؟!مش قادر اتصور ان الحكومة دي جاية في الوقت دا وتفرض رسوم بالمنظر دا؟!".
وانفعل النائب قائلاً: "قبل كده كنت بطالب بإقالة الحكومة لفشلها، انا النهاردة باطالب بتوقيع الكشف الطبي على الحكومة لان ،الحكومة اتجننت يا ريس! اللي يفرض رسوم زي دي في وقت زي دا مش ممكن يكون سليم".
