ميمي جمال: حسن مصطفى رفض مشاركتي في "مدرسة المشاغبين" بسبب عادل إمام وسعيد صالح
كشفت الفنانة ميمي جمال، عن تعاونها مع الفنان عادل إمام وكواليس مشاركتها في مسرحية "مدرسة المشاغبين" لمدة 15 يوما، بعد تعرض الفنانة سهير البابلي إلى وعكة صحية.
ميمي جمال: حسن مصطفى رفض مشاركتي في "مدرسة المشاغبين" بسبب عادل إمام وسعيد صالح
وقالت ميمي جمال خلال لقائها في برنامج "مساء dmc" مع الإعلامية إيمان الحصري: "اشتغلت مع عادل إمام كتير لكن مشتغلتش معاه مسرح إلا كان في فترة كانوا بيعملوا "مدرسة المشاغبين" وكانت سهير البابلي في دور المدرسة وجات فترة عينيها تعبت ولازم تعمل عملية في باريس فـ"سمير خفاجة" الله يرحمه المؤلف قال إحنا كده هنقف 15 يوم أو نجيب حد مكانها".
تابعت ميمي جمال:" وقال لحسن مصطفى جوزي نجيب ميمي فحسن قاله لأ، أنت عارف الصيع اللي موجودين سعيد وعادل ويونس بيقولوا إفيهات لو هي ضيعت إفيه لحد فيهم هيبصلولي ويقولوا مراتك، هو عارف أني ممكن أقول بس ممكن أضيع إفيه لحد فقالي هتبقى مشكلة ومش عاوز يحطني في الموقف دا لكن سمير صمم وقال ميمي شاطرة وهتعمله".
وأوضحت ميمي جمال قائلة: "الممثلة اللي بتشتغل مع كوميديان لازم تفرشله الإفيه تحس أنه هيبدأ يقول تريح ومتتكلمش والإفيه ينزل في الصالة ويتسمع لو اتكلمت في النص هبوظه في طريقة وحسن كان خايف لسعيد يتجنن عليا، لكن الحمد لله اشتغلت 15 يوم بعد ما سمير خفاجة أثر عليه".
