الخسارة بالملايين.. تفاصيل حريق هائل التهم مول العاصمة التجاري بسوهاج.. والسبب ماس كهربائي

• صاحبة محل: بيتي اتخرب وعليا وصلات أمانة 
• أصحاب المحلات التجارية: أقل بضاعة بـ250 ألف وهنتحبس لو مسددناش
• أحد المتضررين: أكل عيشنا اتحرق وبيوتنا إتخربت

شهدت مدينة المنشاة جنوب محافظة سوهاج، حريق هائل بمول العاصمة التجاري، استمر ما يزيد عن الخمس ساعات تفحم على أثره 18 محل تجاري، بعد محاولات رجال الحماية المدينة فى اخماد النيران والسيطرة على الحريق.

وحسب روايات شهود العيان نشب الحريق في تمام الساعه 11.30 مساءًا ليُخمد مع أذان الفجر بحضور الأجهزة الأمنية وضباط مركز الشرطة ورجال الحماية المدنية.

والتقت “مصر تايمز” مع أصحاب المحال التجارية اللذين خسروا بضاعتهم والتى تقدر بالملايين بعد أن أكلت النيران جميع البضائع التى كانت فى المحلات، والى التفاصيل.

بدموع وحسرة وحرقة، قالت السيدة زينب م، إحدى أصحاب المحلات المحروقة، “بيتي اتخرب والبضاعة ب250 الف جنيه ومدفعتش أول قسط، أناعلى باب الله” .

وأضافت والدموع تنهمر من عيونها تشكو حالها بعد تفحم محلها بحريق نشب في مول العاصمة التجاري في الشارع الجديد بمدينة المنشاة جنوب محافظة سوهاج، "اتصلوا بيا ناس من القاهرة قالولي نازل على النت حريق المول اللي شغالة فيه، قولت للعيال عاوزة أشوف لقيته المول بتاعنا، لبست وجريت وعندما وصلت المول كان كله متفحم والنار طالعة للدور الثالث، والرجالة حاولت تطفي الحريق بس مقدرناش".

وأضاف أحمد جمال، “ وبعصبية أثناء حديثه، "أنا صاحب السنتر معايا شريكي، مأجرين المحلات للناس دي قفلنا  الساعه 9 مساءاً وروحنا البيت، وبعد ساعتين جالي اتصال قالولي السنتر راح وشقي عمرك بقى رماد، جريت على السنتر لقيت النار واصلة عيادات الأطباء في الدور الرابع، وكان الباب بيطلع نار 2 شبابيك المونتال ساحت، فصلنا الكهرباء عشان نسيطر على الحريق ولكن مقدرناش".

شهود العيان يروون التفاصيل

قال “محمد.ح”، أحد شهود العيان، ومن المترددين على المول التجاري، إنه فى حوالى الساعة العاشرة مساءاً كان المول قد أغلق أبوابة، خالص ومحدش في المحلات والساعة 11.30 سمعنا صوت صراخ والكهرباء قطعت، نزلت مع الشباب لقينا النار ماسكة في العمارة، حاولنا نطفيها بطفايات الحريق مقدرناش النار شديدة نفسنا اتخنق، الحريق مش في فرع شركة WE لان لو في الفرع مكانش الحريق هيبقي في المول والفرع يتحرق منه اللافتة بس".

واستكمل “علي.م”، :"الناس دي عليها ديون وبيتها اتخرب الله يعينهم، المول ملهوش سنة شغال وفاتح بيوت ناس كتير من النهاردة مفيش عمار، الحريق بدأ بدخان خفيف من الشبابيك وبعدين بدأ صوت انفجارات تكييف فرع شركة "وي" وعمل صوت انفجار ضخم زلزل المكان، الإسعاف لو جات بدري كانت هتنقذ أي حاجه بس جات بعد حوالي ساعة ونص كانت النار فحمت المول".

وقالت "ايمان.خ": "أول قسط لسه مدفعتهوش جبت البضاعة عشان أكسب بالحلال، عليا وصولات أمانة وفلوس لازم تتسدد هجيب الفلوس منين؟ هعمل إيه في عيالي؟ شقي عمري ضاع والنار أخدته يارب عوضني".

فريدة سلام تدعم المتضررين

وأوضح أحد المتضررين من الحريق أن الدكتورة "فريدة سلام" رئيس المركز، قامت بأخذ بياناتهم الشخصية تمهيدًا لدعمهم وتعويضهم، وأوضح أن "الدكتورة فريدة وصلت صباح اليوم وقامت بأخ بيانات أصحاب المحلات المتتضررة، وقالت إن شاء الله مش هنسيبكم وهنحاول نعوضكم.

واختتم حديثة بحرقة وحسرة قائلا :"إحنا محتاجين العوض والله ظروفنا صعبة وأكل عيشنا اتحرق وبيوتنا اتخربت".