عمر طاهر يطالب بإنصاف محمد فؤاد: " تجربة تستحق التقدير "

احتفل الكاتب عمر طاهر بعيد ميلاد الفنان محمد فؤاد الـ 60، حيث كتب على موقع التواصل الإجتماعي “ الفيسبوك” أنه شخص مغامر ومجدد وجرئ، ويطلب من النقاد إنصافه لأن مشواره مليئ  بالمتاعب.

 وتابع عمر طاهر قائلا:"بمناسبة وصول محمد فؤاد لسن ٦٠ أعتقد دي مناسبة لزملائنا نقاد المزيكا الشاطرين إنهم ينصفوا تجربة فؤاد و هي فعلا متعبية كلام و أفكار..سيب آخر كام عمل و هاته من الأول هتلاقيه في منطقته كان مغامر و مجدد و جرىء أكتر من منافسه الأشهر".
 

أضاف عمر طاهر :"هو أول اللي اشتغلوا مع عصام عبدالله. ياسر عبد الرحمن. فهد. مدحت الخولي. احمد منيب. مودي الإمام..هو اللي قدم وليد سعد محمد رحيم مصطفى عوض عزيز الشافعي تامر عاشور.
الوحيد في جيله اللي كانت انطلاقة نجاحه من غير حميد الشاعري اشتغل معاه بعدين..الوحيد في جيله اللي  خاض تجربة جريئة ألبوم كامل مع احمد الحجار".

عمر طاهر: محمد فؤاد موهبة تستحق التقدير 

وأردف :" إزاي صوته وهو بيقول يا ليل بقى فاصل إذاعة الأغاني المصرية هو و ماحدش غيره من جيله. مواضيع أغانيه ماوقفتش في حتة واحدة .. فيلمين مع مخرج كبير زي خيري بشارة و فيلم غير خريطة السينما مع هنيدي .. طلع من الفلكلور غنا و قدم تترات بقت تفصيلة في اسماع الناس.. طبيعة نظرة الناس ليه و شكل الحتة اللي سكنوه فيها". 

وختتم عمر طاهر :"تجربة مليانة كلام و كتابة و حاجات يتقدر تعبه فيها و حاجات فكت منه طبعا زي أي حد. بس إجمالا تجربة تستحق التقدير و تستحق انها تتحط في مكانها بالضبط و إن حد ينتشلها من منطقة اللطافة و القلش و كام عمل مش قد كدة مايلغوش اللي الراجل أنجزه بالفعل..كل سنة و انت طيب يا فؤش".