البلدى يوكل.. "أم أحمد" أشهر صانعة فطير مشلتت فى كفر الشيخ: بعلم ستات البيوت وسر الصنعة فى الفلاحين

النهاردة حاولنا نعرف سر صناعة الفطير المشلتت الأكلة الشعبية فى كفر الشيخ، دخلنا مصنع وبدأت جولتنا، "أم أحمد" صانعة الفطير الأشهر فى المحافظة بدأت تعلمنا الخطوات والمقادير وسر الصنعة. 

المقادير كانت جاهزة بدأت "أم أحمد" بسرعة فى التحضير، لما قربت تنتهى من عملها بدأت حديثها معانا فقالت: "أنا بعمل الفطير ده وأنا عندى 15 سنة" الحكاية بدأت معاها منذ الطفولة، يمكن ده سر شهرتها واتقانها الصنعة. 

استمرت فى العمل واستكملت الحديث وقالت: "الزبدة الفلاحى والسمن البلدى أهم شئ فى صناعة الفطير، واللى عايز ياكل فطير بجد يروح الفلاحين"، نصيحة حلوة أكدت فيها إن صناعة الفطير البلدى موجودة فى القرى على خير السمن البلدى. 

كملنا جولتنا وبدأنا نشوف مراحل الصناعة أكتر، اكتشفنا انها بدأت تصنع فطيرة طولها 2 متر، استغربنا من المشهد لكنها رجعت للحديث عشان نفهم فقالت: "متستغربوش ده سر الصنعة والزباين الحمد لله بتزيد بسبب اننا عارفين شغلنا" 

استكملت حديثها وقالت: "أنا بحاول أعلم ستات البيوت صناعة الفطير البلدى، والطريقة سهلة والمقادير كمان مش كتير، أنا بعمل كده عشان نفسي الصناعة دى الكل يتعلمها" 

ختمنا رحلتنا معاها عرفنا شوية عن سر صناعة الفطير المشلتت فى كفر الشيخ لكن سر الصنعة عند "أم أحمد"