أسامة نبيه: بحمد ربنا على النتيجة والأداء خصوصاً في الشوط الأول

قال أسامة نبيه المدير الفني المؤقت لنادي الزمالك، إنه يحمد الله على نتيجة المباراة أمام الجونة وعلى الأداء خصوصاً في شوط المباراة الأول، وانتهى اللقاء بفوز الفارس الأبيض بهدفين مقابل هدف.

وأضاف نبيه في المؤتمر الصحفي عقب انتهاء اللقاء:"البداية مكناش كويسين في اول ٥ دقايق، ولكن قدرنا نمسك كرة ونسجل هدفين، لا أعلم سبب التراجع بعد الهدف الثاني وهذا ما سنتحدث بشأنه مع اللاعيبه، وهدف الجونة في نهاية الشوط الاول رجع لهم الامل والطموح في التعادل، روح اللاعيبة والاصرار على المكسب كان لها دور كبير مثلما حصل في ماتش فيوتشر".

وتابع "حتى لو الكرة مش هتبقى ماشية معانا بس عايز اقول للجمهور، أن القتال هيعوض ده وده لمسته في عيون اللاعيبه من الماتش اللي فات، رسالتي للاعيبه إننا هندي كل لاعب حقه ومنهم روقا مثلا كان بعيد تماما، ودوري أجد بديل لطارق حامد.

 

و أكمل  "هناك كواليس وتفاصيل كتير بيني وبين اللاعيبه بس اكيد لما ربنا يكرمك في الوقت القاتل يبقى انت عملت حاجة صح، الناس الماتش اللي فات اتكلمت على اني ليه لعبت بحمزة المثلوثي اليوم قدم مباراة جيدة".

وواصل "عمري ما هضغط على لاعب وهقف جنب كل لاعب للأني محتاج اللاعيبه دي مكملة لنهاية الموسم، طارق حامد نزل تدريبين ، ولكن قالي انا لسة مش جاهز 100%؜ ومش هنزله الا لو كان جاهز بنسبة 100%؜".

 واكمل "حازم لم يبدأ المباراة لاني محتاجه  في ماتش الوداد وغصب عني هيحصل روتيشن سواء إيقاف او إصابة، لازم أدي اللاعب ثقته في نفسه ولإمام من اللاعيبة المميزة في التسديد واتكلمت معاه في ضرورة التسديد لدينا الكثير لنقدمه ولكن الوقت ضيق"

واختتم "الثقة مفقودة بقالها فترة والمرحلة دي هي مرحلة اعادة الثقة للاعيبه وده حصل في مباراتين الدوري وكنت عايز اوصل رسالة للجمهور إن الفريق عائد مرة تانية".